وضاحت
ایچ آئی وی کے متاثرہ مریض جو اب تک سامنے آئے ہیں ان کی تعداد غیر معمولی طور پر بہت زیادہ بتائی جارہی ہے
محکمہ ایچ آئی وی کنڑول گورنمنٹ آف سندھ کے تحت ایچ آئی وی سرویلینز ٹیمیں تشکیل دی گئیں ہیں
کراچی ………سندھ ایمپلائز سوشل سیکورٹی انسٹی ٹیوشن کے کلثوم بائی ولیکا اسپتال کے حوالے سے گذشتہ چند دنوں سے ایچ آئی وی سے متاثرہ مریضوں کی خبریں مسلسل سامنے آرہی ہیں۔اس حوالے سے ادارہ یہ وضاحت پیش کرنا ضروری سمجھتا ہے کہ ایچ آئی وی کے متاثرہ مریض جو اب تک سامنے آئے ہیں ان کی تعداد غیر معمولی طور پر بہت زیادہ بتائی جارہی ہے، گذشتہ تین ماہ میں ایسے سات مریضوں کی باقاعدہ نشاندہی ہوئی ہےاور زیادہ امکان یہ ہے کہ یہ مریض ولیکا اسپتال میں علاج و معالجہ سے پہلے ہی اس ( ایچ آئی وی ) کا شکار تھے
یاد رہے کہ ضلع کیماڑی بلخصوص سائیٹ ایریا میں ایچ آئی وی کے پھیلاؤ کے حوالے سے اطلاعات مسلسل سامنے آرہی تھیں کیونکہ قریب و جوار کے علاقہ میں عطائی معالجوں کی غیر معمولی تعداد ہے جو اس طرح کی بیماریوں کے پھیلاؤ کا باعث بن رہے ہیں۔ کلثوم بائی ولیکا سوشل سیکورٹی اسپتال، سائٹ ایریا میں اس حوالے سے حفاظتی انتظامات اٹھائے گئے ہیں اور فوری طور پر نا صرف مریضوں اور اسٹاف کی اسکریننگ کروائی جارہی ہے بلکہ اسپتال میں صفائی و ستھرائی پر بھر پور توجہ بھی دی جارہی ہے
تا کہ کسی بھی قسم کا انفیکشن نہ پھیلے، ساتھ ہی ایچ آئی وی کے حوالے سے اسٹاف اور مریضوں میں آگاہی مہم بھی چلائی جارہی ہے۔ اس کے علاوہ حکومت سندھ کےمحکمہ ایچ آئی وی کنڑول گورنمنٹ آف سندھ کے تحت ایچ آئی وی سرویلینز ٹیمیں تشکیل دی گئیں ہیں جو مختلف علاقوں میں دورے کررہی ہیں اور ایچ آئی وی اسکریننگ اور علاج معالجہ کی سہولت بھی فراہم کررہی ہے۔ اس حوالے سے کلثوم بائی ولیکا سوشل سیکورٹی اسپتال میں بھی ایچ آئی وی سرویلینز ٹیم نے وہاں کا دورہ کیا اور اسپتال میں مریضوں اور اسٹاف کی ایچ آئی اسکریننگ کی اور علاج معالجہ کی سہولت بھی فراہم کی جارہی ہے
