جناح ٹاؤن ضلع شرقی میں صفائی اور تجاوزات کے خاتمے کے لیے بڑا اقدام
کراچی………یو سی 04 سینٹرل جیل فلائی اوور کے نیچے قائم کچرا کنڈی، تجاوزات اور غیر قانونی پارکنگ کے معاملات پر اہم دورہ کیا گیا، دورے میں صوبائی وزیر بلدیات سید ناصر حسین شاہ، وزیر محنت سعید غنی، ٹاؤن چیئرمین رضوان عبدالسمیع اور سندھ سالڈ ویسٹ مینجمنٹ بورڈ سے نوید اعوان اور انکی ٹیم بھی شریک.
وفد نے موقع کا جائزہ لیتے ہوئے فلائی اوور کے نیچے پھیلی ہوئی کچرا کنڈی، غیر قانونی پارکنگ اور قبضہ شدہ جگہوں پر شدید تشویش کا اظہار کیا، صورتحال کا جائزہ لینے کے بعد صوبائی وزیر سید ناصر حسین شاہ نے موقع پر ہی احکامات جاری کرتے ہوئے کہا کہ کچرا کنڈی کو فوری طور پر ہٹایا جائے فلائی اوور کے نیچے قائم غیر قانونی پارکنگ اور تمام قبضہ شدہ جگہوں کو بلاتاخیر خالی کروایا جائے.
انہوں نے مزید کہا کہ شہر کی صفائی، ٹریفک کی روانی اور شہریوں کو بہتر ماحول فراہم کرنا حکومت کی ترجیحات میں شامل ہے، اور ایسے مقامات پر بہتری کے لیے واضح اور سخت اقدامات کیے جائیں گے.
ٹاؤن چیئرمین جناح رضوان عبدالسمیع نے کہا کہ عوامی سہولت اور شہریوں کے حقِ راستہ پر کوئی سمجھوتہ نہیں ہوگا، اور اس سلسلے میں مزید مؤثر حکمتِ عملی پر عمل جاری ہے.
